ضحكة حليمة
الطفل عاف المدرسة .. نط للسور
يدور أبله تشبهك يا عظيمة
لا تعاتبين الطفل .. والطفل معذور
الحب ماهو موعظة مستقيمة
الحب لو ما يقلب الحكم ويثور
انا اشهد انه حب ماله حشيمة
سلالة آدم كلها لك جمهور
ما تختلف فيك العيون السليمة
وإن كان بعض الناس شافوك ديكور
أنا أشوفك حالمة مثل غيمة
يا أكسجين الناس في كل العصور
انتي الخرافة في الأغاني القديمة
وانتي مرور الحب في بال عصفور
عصفور لكن ذكرياته أليمه
اشذنب رجلٍ ماخذ أربع من الحور ؟
شافك على غفلة وطلق حريمه
واشذنب شاعر يكتب بقلب مقهور ؟
ترضين قلبه يستقر في جحيمه ؟
بالأمس يامر لكن اليوم مأمور
كان الملك والحين من غير قيمة
يسهر طوال الليل .. وينام مخمور
يحلم بعطرك ويتذكر نسيمه
شاعر وقبلك كان له جيش وقصور ..
لما انهزم .. ليش افتخر بالهزيمة ؟
مرت على عرسك سنه وأربع شهور
وللحين أحزانه في عينه كظيمة
في أي مذهب والا في أي دستور ؟
تكتب على العاشق نهاية وخيمة ؟
لا تفرحين إن قلت عاشق ومكسور
الحب أصبح في بلادي جريمة
مدينةٍ تستقبلك .. تمطر زهور
ومدينةٍ سافرتي عنها .. عقيمة
خمسة حروف الأرض من أجلها تدور
والقلب أبيض والملامح لئيمة
إذا كتب ربي وأصبحت دكتور ؟
بدرّس الطلاب ضحكة حليمة
